|| చెమ్మ ||
పుట్టగానే పలకరిస్తుంది ఏడుపులో..
ఆ చెమ్మ ఎంతానందమో కన్నవారికి!
ఎదుగుతుంటే పరిచయించుకుంటుంది ఆటల్లో..
ఆ చెమ్మ ఎన్నిదెబ్బలేస్తుందో బాల్యానికి!
మనసంటే చూపిస్తుంది కాంక్షల్లో..
ఆ చెమ్మ జ్ఞాపకాలెన్నో యవ్వనానికి!
పోరాటమంటే తెలియజేస్తుంది ఆశయాల్లో..
ఆ చెమ్మ నేర్పే పాఠాలెన్నో నడివయస్సుకి!
జీవితమంటే అర్థంచేయిస్తుంది చివరంచులో..
ఆ చెమ్మ అనుభవాలెన్నో వృద్ధాప్యానికి!
ఆనందాల్లో ఒకసారి., ఆవేదనల్లో మరోసారి.,
చెక్కిలిని తడిమే ప్రతి చెమ్మా అర్థమున్నదే!
మనిషి మనిషితో అనుబంధాన్ని పెనవెసుకుంటూ.,
ఆర్ద్రతల్లో గాఢతల్లో బ్రతికుండే ప్రతి చెమ్మా అందమైనదే!
కంటికి ఆభరణమై., మనసుకి ఉపశమనమై.,
మోముపై ముత్యంలా మెరిసే ప్రతిచెమ్మా విలువైనదే!
కన్నీటి చెమ్మను చులకచేయక.,
సంతోషాల చెమ్మను తలకెక్కించుకోక.,
చెమ్మచెమ్మకూ ఓ నేర్పుందని తెలుసుకో!
రాలుతున్న ప్రతిచెమ్మనూ జారనీయక దాచుకో!!
నీ హృదయపుష్పంలో చెమ్మకూ ఇంత చోటిచ్చి నిలుపుకో!!!
No comments:
Post a Comment