ఆహ్వానం...

నిన్న నీది కాదు..
రేపు ఉందో లేదో తెలియదు..
ఈ క్షణం ఒక్కటే నీది!
అమృతమంత అమూల్యమైనది
అమ్మప్రేమంత అపురూపమైనది.. ఈ క్షణం..  
తిరిగిరాని నీ గతంతో దాన్ని కాటేయకు?
రేపటి చింతలతో కాల్చి వృధా చేయకు?
జీవించు ఈ క్షణం.. ఆస్వాదించు కదులుతున్న ప్రతి క్షణం

ఒంటరిగా వచ్చిన నీకు తోడైన బంధాలు ఎన్నో..
నిను తాకిన గాలితో.. నువు నడిచిన నేలతో..
మురిపాల అమ్మతో.. నడిపించిన నాన్నతో..
ఆటలాడిన చెల్లితో.. ఏడిపించి నవ్వుకున్న అన్నతో..
పలకరించిన చెలిమితో.. ప్రేమను పంచిన ప్రేమతో... 
నీ మదిలోని ఆశలతో.. నీ పెదవిపైన చిరునవ్వుతో...
గుట్టుగా జారే కన్నీటి చుక్కతో.., నీకు నీతో...   
ప్రతి క్షణం మధురం... సుమధురం...
జ్ఞాపకాల తోటలో తీయని పండు ఉన్నా లేకున్నా..,
ఇప్పుడు ఈ క్షణం నీకుంది..
రాబోయే మరు సంవత్సరం ఎదురుచూస్తూంది..
అప్పుడైనా ప్రతి క్షణాన్ని ఆస్వాదిస్తావని..
కొత్తగా సంతోషాల మాలతో ఆహ్వానం పలుకుతావని...